KIRO TEZE

KIRO TEZI

Jü Cinıkê bı mêrıkê xu’ya biyê, rocê ama, mêrık gıno pıro, merdo. Taqawıtina (emekliyina) iy ciniya xo rê manda, cinıkı serron’a na taqawutin’a weşiya xo ramıta, şiya...

Zamanê  ra tepia xorto dı azebê amo, cinıkı rê biyo mısteri. Zerrê cinıkı ki xorti rê ta diyo, hama: “Ez kı bızeweci, nêbo, taqawutina mêrdê mı bıbırriyo? Ala fındı, ez sêri, rêyê muxtari ra pers keri, bêri” vato.

Şiya, pers kerdo, muxtari vato:

“Wulı, ez qanun – manun nêzonı, nae ya hakim ya ki qaymıqam zaneno. Ekı wazenay, sodıra bê, şimı şükı, pers kımı.“ Cinıkı,

“Beno, sodıra şimı“ vato. 

Lêla vestê ra, şiyê şükı qonağê hukmati. Muxtari jü bı jü wejiyat hakimi rê qeşi kerdo, vato. Hakimi:

“Ekı zeweciye, thaqawutina mêrdê xo bırrina, elbet” vato. Muxtari cinıkı rê:

“Qererê xo bıdı, hurdımino ra jüyê weçinı“ vato.  Cinıkı nêşkiya qerer bıdo:

“Hatê dı perêy, hatê dı xorto dı azeb esto, nêzonı se bıkeri. Muxtar, to sa vanay?“ vato. Muxtari sêr kerdo kı ‘xort’ fekê cinıkı ra qe nêgıno war ro, vato:

“Taqawutinı bırrina, va bıbırriyo, ez kı hurındia to dı bi, kırê teji gênı, xorê kêfê xo dı sêr konı...” 

hewno gıran

HİRÊ HAVALÊ TÜTINCİ

Hirê havali benê, xorê idarê xo tütın’a kenê. Ni havali serrı bı serrı tütınê xo ramınê, barê goligo kenê, benê, şükı bı şükı gêrenê, xorê rosenê.

Ni havalo ra ê jüyê hewnê xo zaf gıran beno. Koti dı kı areşinê, sêr kenê kı havalê xo taf hewn ra şiyo, dina kı bırıciyo, eyn dı niyo.

Rêyê nê, dı rey nê, havalê xo vanê: “No nia nêbeno.” Rocê, “Ma ni rê oyınê bıkımı” vanê, kunê cı, mabênê xo dı pilanê kenê...

Rocê oncia caê dı areşinê, sêr kenê kı havalê xo hao oncia hewn ra şiyo. Kunê pıra, veng danê cı, se kenê, nêeşino xo.

Nina gênê, doxindia havalê xo kenê ya, salvaro oncenê cêr, vırqoşi çarnenê ya, qını dı hak sıkınê (sıknenê), oncia salvaro oncenê cor, raa xo ra dewam kenê...

Mêrık lêla vezeno ra, nata-bota sêr keno kı kes çino, ano kı ravezo, sêro; sêr keno kı qına xo hita, pêro çılqena, “hala hala, no çıko?!” vano, destê xu’ya qına xo oxlemis keno: “Wi-thaêê, sazê mı kerdê, nê mı!” vano, doxindia salvaronê xo qeym gêno pê, vezeno ra, vazeno...